*_*ഇത് എന്റെ പ്രിയ സുഹൃത്തും ഇ.ടി മുഹമ്മദ് ബഷീർ എം.പിയുടെ ഡൽഹി ഓഫീസ് സെക്രട്ടറിയുമായ ലത്തീഫ് എഴുതിയ അനുഭവകുറിപ്പാണ്. നമുക്ക് തണലേകുന്ന ഈ പ്രസ്ഥാനത്തെ നിസ്സാര പ്രശ്നങ്ങളുടെ പേരിൽ നമ്മൾ തകർത്താൽ നമ്മെ കാത്തിരിക്കുന്നത് ഉത്തരേന്ത്യയിലേക്കാളും വലിയ ദുരന്തമായിരിക്കുമെന്ന് നാളെ ഈ പ്രസ്ഥാനത്തെ നയിക്കേണ്ട എന്റെ പ്രിയ സഹപ്രവർത്തകരുടെ മനസുകളിൽ ഒരു ഓർമ്മപെടുത്തലിന് വേണ്ടി ഇവിടെ പോസ്റ്റ് ചെയ്യുന്നു.*
കഴിഞ്ഞ ചൊവ്വാഴ്ച ചെന്നൈ ട്രിപ്ലികെനിൽ അന്തി ഉറങ്ങുന്ന ഖാഇദേ മില്ലത്തിന്റെ ചാരത്തു നിന്ന് സലാം പറഞ്ഞു ഇന്ത്യൻ യൂണിയൻ മുസ്‌ലിം ലീഗിന്റെ ശേഷിപ്പുകൾ തേടി നടന്നു തുടങ്ങിയതാ ഞാനും വാജിദും ഫാസിലും...
തീവണ്ടിയിൽ കിട്ടിയ പാതി സ്ലീപ്പർ ക്ലാസ്സിൽ ഞങ്ങൾ കൊൽക്കത്ത വരെ..
കയ്യിൽ പുസ്തകത്തിലാക്കി പൂർവ സൂരികളുടെ (സീതി സാഹിബ്‌, പോക്കർ സാഹിബ്‌, ബാഫഖി തങ്ങൾ, സി.എച്ച്, സേട്ട് സാഹിബ്‌, ബനാത് വാല സാഹിബ്‌, ശിഹാബ് തങ്ങൾ, സീതി ഹാജി, നാട്ടിക മജീദ് സാഹിബ്‌) കരളലയിപ്പിക്കുന്ന കഥകൾ ഉണ്ട്...
രണ്ടു ദിവസം കൊണ്ട് എല്ലാം വായിച്ചു.. ഞങ്ങൾ.. രക്തത്തിൽ ലീഗ് ലഹരി കയറി മുമ്പേ മറഞ്ഞ നേതാക്കളെ മുൻ നിറുത്തി കൊൽക്കത്തയിൽ തീവണ്ടിയിറങ്ങി നേരെ പിച്ച വെച്ചത് നോർത്ത് 24പർഗാന ജില്ലയിലേക്ക്..
അതെ 1971ൽ മുസ്‌ലിം ലീഗ് മന്ത്രിയായിരുന്ന ഹസനുസ്സമാന്റെയും MLA ഹാറൂൺ റഷീദിന്റെയും നാട്ടിലേക്ക്...
മൂന്ന് പതിറ്റാണ്ടോളം ചെങ്കൊടി നിഷ്ട്ടൂര താണ്ഡവമാടിയ ഗ്രാമങ്ങൾ...
ഒരിറ്റു കുടിനീരിന് പോലും നെട്ടോട മൂടുന്ന പിന്നോക്ക സമുദായം... വിദ്യ എന്തെന്നറിയാത്ത ഹതഭാഗ്യർ... പൂർവികരുടെ പിഴവിൽ നഷ്ടപെടുന്ന നാളകളെ കുറിച്ച് ആകുലതകളില്ലാത്ത ബാല്യങ്ങൾ...
നിലം പതിക്കാനായ ചോർന്നൊലിക്കുന്ന മസ്ജിദുകൾ..
പഴമയുടെ ചരമ ഗീതമോതുന്ന ചിതലരിക്കുന്ന പുൽ വീടുകളുടെ ഉമ്മറത്തു അന്തിമയങ്ങിയാൽ കണ്ണു തുറക്കുന്ന മണ്ണെണ്ണ വിളക്കുകൾ കാണാം ..
പേരിന് പോലുമില്ലാത്ത മൺപാതകൾ..
മാറാല പിടിച്ച ഒന്ന് രണ്ടു പെട്ടിക്കടകൾ...
ഞങ്ങളുടെ നടത്തിനൊക്കെ ഒരുതരം മരവിപ്പ് പോലെ...
ഇനി ഞങ്ങൾക്ക് പോവാനുള്ളത് മുർഷിദാബാദിലേക്കാ..
അതെ.... 1970കളിൽ മലയാള മണ്ണിനെ CHഉം കൂട്ടരും അമ്മാനമാടിയപ്പോ ഇങ്ങകലെ വങ്കനാടിന്റെ ലീഗ് ചരിത്രത്തിൽ എ.കെ.എ ഹസനുസമാനും അനുയായികളും തിലകം ചാർത്തിയ മുർഷിദാബാദിന്റെ മണ്ണിലേക്ക്...
കയ്യിലുളള സേട്ട് സാഹിബ്‌ (ഒരു ഇന്ത്യൻ വീര ഗാഥ) പറയുന്നുണ്ട് 1970കളിലെ ഇന്ത്യൻ യൂണിയൻ മുസ്‌ലിം ലീഗ് ചരിത്രം...
ഗോപാലപ്പൂരിന്ന് മുർഷിദാബാദിലേക് ലോക്കൽ തീവണ്ടി കയറിയപ്പോ മനസ്സിൽ മുഴുവൻ 1970കളിലെ ലീഗ് മാത്രമായിരുന്നു..
ഇങ്ങ് മലയാളക്കരയിൽ CHഉം ബാഫഖി തങ്ങളും, സീതി സാഹിബും മുടിചൂടാ മന്നന്മാരായി വിലസുന്ന കാലം.. അകലെ ഡൽഹിയിലെ ഇരു സഭയിലും മാറി മാറി ഖാഇദേ മില്ലത്തും സേട്ട് സാഹിബും ഉമ്മത്തിന്ന് കാവൽ നിന്ന വർഷങ്ങൾ....
ബോംബെയുടെ തെരുവുകളിൽ സമുദായത്തിനു തെരുവ് വിളക്കായി ബനാത് വാല സാഹിബ്‌ കാവൽ നിന്ന ദിനരാത്രങ്ങൾ....
ഉത്തരേന്ത്യയിൽ വിഭജനത്തിന്റെ മറവിൽ ഒരു സമുദായത്തെ രാവന്തിയോളം കശാപ്പിന് വന്നവർക്ക് മുന്നിൽ വങ്കനാട്ടിന്റെ മണ്ണിൽ ജനിച്ച മണ്ണിനായി ഹസനുസ്സമാനും കൂട്ടരും നടത്തിയ ചെറുത്ത് നിൽപ്പിന്റെ കഥ പറയുന്ന ഇടവേളകൾ....
തമിഴന്റെ ഊരിൽ സമദ് സാഹിബിന്റെ നായകത്വത്തിൽ പടവെട്ടി ഉശിര്‌ കാട്ടിയ ആണ്ടുകൾ....
ഉമർ ബാഫഖി തങ്ങളും, മമ്മു കേയി സാഹിബും, അടക്കമുള്ളവർ കണ്ണൂർ സെൻട്രൽ ജയിലിൽ ഈ സമുദായത്തിനായ് തള്ളിനീക്കിയ മാസങ്ങൾ...
ഒന്നിനു പിറകെ മറ്റൊന്നായി ഓർമ്മകൾ മുർഷിദാബാദിലേക് ദൂരം കുറക്കുന്നുണ്ടായിരുന്നു....
അസൻസോളിൽ വണ്ടിയിറങ്ങി.. ഇനി 180 കിലോമീറ്റർ ലോക്കൽ ബസിൽ വേണം മുർഷിദാബാദിന്റെ കുഗ്രാമങ്ങളിലെത്താൻ..
പൊടിപിടിച്ച ഗ്രാമങ്ങൾ... കുണ്ടും കുഴിയും നിറഞ്ഞ റോഡുകൾ.. ഇറങ്ങാനായപ്പോഴേക്കും ശുഭ്രവസ്ത്രം കരിയിൽ മുങ്ങിയിരുന്നു..
7 മണിക്കൂറെടുത്തു ഈ ചുകപ്പ് മാഞ്ഞ മണ്ണിൽ എത്താൻ ... താടി നിരച്ച 1970കളിൽ ബാക്കിയായ ലീഗുകാരിൽ പലരും ഇന്നും മുസ്‌ലിം ലീഗിന്റെ തിരിച്ചു വരവിനായി കാത്തിരിക്കുന്നത് ഗ്രാമങ്ങളിൽ ഞങ്ങൾ നേരിൽ കാണുകയായി....
ഒരു കാലത്ത് AKM ഹസനുസ്സമാനും നാസിറുദ്ധീൻ ഖാനും, അഫ്താബുബുദ്ദിൻ അഹമ്മദും, ഹാറൂൺ റഷീദും, ബദ്‌റുദ്ധീൻ റഷീദും, മുഹമ്മദ് സമൗനും ഈ ഉമ്മത്തിനായി പട പൊരുതി നിന്ന മണ്ണിൽ....
1971 ൽ ലീഗിന് 4 MLA ഉണ്ടായിരുന്ന ഗ്രാമങ്ങൾ..
1970കളിലെ ബംഗ്ലാദേശ് രൂപീകരണ കാലത്തുണ്ടായ അഭയാർത്തി പ്രയാണവും കോൺഗ്രസ് മുഖ്യൻ സിദ്ധാർഥ് ശങ്കർ റായിയുടെ സാധാരണക്കാരെ നട്ടം തിരിച്ച പരിഷ്കാരങ്ങളിൽ കോൺഗ്രസ് ക്ഷയിക്കുകയും കോൺഗ്രസിന്റെ മുസ്‌ലിം മോഹന വാഗ്ദാനങ്ങളിൽ വഞ്ചിതരായി മുസ്‌ലിം ലീഗിലെ ഒരു വിഭാഗം കൂറ് മാറിയതോടെ മുസ്‌ലിം ലീഗ് തളർന്നതും മാർക്സിസ്റ്റ്‌ പാർട്ടി ശക്തമാവാൻ കാരണമായി..
1988ലുണ്ടായ വർഗീയ കലാപത്തെ തുടർന്ന് കട്ര മസ്ജിദിൽ ജ്യോതി ബസുവിന്റെ സർക്കാർ നിസ്കാരത്തിനു അനുമതി നിഷേധിച്ചതിൽ പ്രതിഷേധിച്ചു ഹസനുസമാന്റെ നേതൃത്വത്തിൽ കട്ര മസ്ജിദിൽ ലക്ഷത്തിൽ പരം മുസ്‌ലിംലീഗ് പ്രവർത്തകരെ സംഘടിപ്പിച്ചു നിസ്കാരത്തിനു പദ്ധതിയിട്ടതും സിപിഎം സർക്കാർ 144 പുറപ്പെടുവിച്ചതും ഹസനുസമാന് മസ്ജിദിൽ എത്താൻ പറ്റാതെ വന്നതും മുർഷിദാബാദ് ഒരു രക്തക്കളമാവാൻ കാരണമായി... തുടർന്നു മുല്ലമാരുടെയും ഇമാമുമാരുടെയും ഇടയിലുണ്ടായ വിഭാഗീയത രൂക്ഷമാവുകയും മുർഷിദാബാദിൽ മുസ്‌ലിം ലീഗിനെ പാടെ ഇല്ലാതാക്കുന്നതിന് വരെ ഇത് കാരണമായി... കൂടാതെ മുസ്‌ലിം ലീഗിലുണ്ടായ നിർഭാഗ്യകരമായ പിളർപ്പും കൂടി മുസ്‌ലിം ലീഗിനെ ഉത്തരേന്ത്യൻ മണ്ണിൽ നിന്നും പടിയിറക്കി..
-----------------------------------
1. ഹരിഹർപട 80% മുസ്‌ലിം പിന്നോക്കം (രണ്ടു വട്ടം ലീഗ് MLA, മുഹമ്മദ് ആഫ്താബുദ്ധീൻ, 1969,71)
2. ഭഗവാൻഗുള 82% മുസ്‌ലിം പിന്നോക്കം (1971ൽ ലീഗ് MLA സമാഉൻ വിശ്വാസ്)
3. നൗദ 75% മുസ്‌ലിം പിന്നോക്കം (നാസിറുദ്ധീൻ ഖാൻ മൂന്നു വട്ടം MLA, 1969,71,72. പിന്നീട് ഇയാൾ കോൺഗ്രസിൽ poyi) രണ്ടു മാസം മുമ്പ് മരിച്ചു.. ലീഗിൽ വരാൻ ഇഷ്ടമായിരുന്നു..
4. ജംഗിപ്പൂർ 77% മുസ്‌ലിം പിന്നോക്കം (ബദറുദ്ദീൻ അഹമ്മദ് 1971ൽ MLA)
5. ഗോബിന്ദർ ചന്ദർ മണ്ഡൽ (SC/ST) ലീഗ് MLA ആയിരുന്നു 1971ൽ - ഇപ്പോൾ ജീവിച്ചിരിക്കുന്നു.
കടപ്പാട് സത്താർ കുറ്റൂർ
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ